Rev 19 | MHL | STEP | Aria nain weesereya mua teeria maneka owow iinan-pa mukuruna wuami farimik nain miimam. Feenap faremi maemik, “Mua Maneka unuma fakeriyen! Os-ke yia aawiya, ne unum maneka ne kekanowa wiar ikua.

Revelation of John 19

Owow iinan-pa kemelimik

1 Aria nain weesereya mua teeria maneka owow iinan-pa mukuruna wuami farimik nain miimam. Feenap faremi maemik,

“Mua Maneka unuma fakeriyen! Os-ke yia aawiya, ne unum maneka ne kekanowa wiar ikua. 2 O makena, ne baliwep yia mekawap yia kiripomiya. Naeya era emeria nain miiw sira samora-pa wia pikiwok nain os-ke pina kiripomak. Ona uuwow mua wia ifakimeya os-ke kiripami o samorak,”
naap maemik. 3 Ne kiiriw nainiw faremi maemik,

“Oo, Mua Maneka unuma fakeriyen! Moram o owowa nain samoreya awemi kawus anane maneka naap urupem-ikainon!”
4 Wi iperowa ten erup erepam nain ne maa mokok enuma erepam nain Mua Maneka pokap ikua nan miir onoma-pa keema muuna mikap unuma fakerami maemik, “Makena! Mua Maneka unuma fakeriyen!” 5 Ne aria Mua Maneka pokap ikua nan iwakara oko feenap imenareya miimam,

“Yiena Mua Maneka unuma fakeriyen. Ni ona uuwow mua o unuma wiar fakereka. Ne ni mua unumiya ne ni mua unum marewa, ni unowiya o kema suuwap kema tootoniman nain pun o unuma fakereka,”
naap maek. 6 Naap ikok farow maneka miimam nain eka duunowa saarik miimami kiiriw aapereka paranowa saarik miimam. Feenap maemik,

“Mua Maneka unuma fakeriyen! Moram yiena Maneka, Mua Maneka kekanowa akena-pa maa muutitik urufiya. 7 I kemeliyen, kemelami o unuma wiar fakeriyen. Moram Sipsip Muuka ona emeria aawow fofa imenarek. Naapeya emeria nain maa bala ele-eliwa opap arep ikua. O mia suuwowa kia melin akena nain iwiwkin wuap ikua,”
naap maemik. Mia suuwowa kia nain Yeesus Krais teeria wi sira kaken eliwa onam-ikemik nain pepekimok.

9 Ne aria ensel-ke efa maakek, “Opora fain siisime, ‘Wi mua Sipsip Muuka emeria aawowa naep wia fariwkin ekapep maa wiamiya enimimik nain eliw kemeluk,’ naap siisime.” Naap efa maakep-puap kiiriw efa maakek, “Opora nain Mua Maneka opor makena-ke.” 10 Naap efa maakeya yo keema muuna mikap unuma fakerekam naep onamkun efa maakek, “Naap me one! Yos pun ni saarik, no nena teeria unowiya Yeesus opora wiar opiman, yos pun uuwow mua naap nain-ke. Mua Maneka waisow lotu one,” naap efa maakek. Moram Ewar Eliwa kema wieya opor kokosa maimik nain Yeesus opor makena maimik.

Mua oko oos kia-pa karuok

11 Ne aria aapereka-ke pukep aakia ikaeya oos kiam urufam. Mua oos-pa pokap ikua nain unuma feenap, Mua Kakeniw Eliwa ne Mua Makena. O irakowa ikiwep mua sira baliwep wia amisarep wia mekawap wia samoriya. 12 Ona mokok oposia-ke mukuna saarik wilinem-ikua ne ikiwos maa bala siisia ononer ikomakek. Ne ona mia-pa unuma onaiya siisimiwkin ikua, nain wiar amisarowa me pepek, ona waisow amisarep ikua. Ne unuma feenap unufimik, “Mua Maneka Opora.” Ona mia suuwowa nain aka sulunem-ikua. 14 Owow iinan irakow teeria unowa mia suuwowa kia melina suuwap oos kia irap o ookamik. 15 Irakow fura maala opaimika-pa fuunep ikua, ne miiw mua nain-pa wia ifakiminon. Ona aen kuuma opap ikok miiw unowa kekanowa wia urufam-ikainon. Ne Mua Maneka bagiaw manek akena wia ofakowami wain makena saarik ititowa naap wia ititam-ikainon. 16 Unuma ona mia suuwowa-pa ne ona kufa pun wiar siisimep-puamik nain feenap, “O wi owow saria unowa nain wiena Saria Maneka-ke, ne wi owow mua mane-maneka unowa nain wiena Mua Maneka-ke.”

17 Aria nain weeserep ikaeya ensel oko ama mokoka-pa iimarep ikaeya urufam. Nan ikok nepa unowa aapereka iinan akena-pa birinem-miawiwkin wia farem-ikua, “Nee emawik, ni ekapeka oo. Mua Maneka maa enow maneka oniya nain unowiya ekapep wiar taaneka! 18 Ekapep wi teeria umimik fain mia oposia wiar enimeka: wi owow saria, wi irakow mua ne wiena woos mua, wi mua unum maneka, wi mua oos-pa karuimik nain wiena oos onaiya. Ne wi mua papako wi mua sesa marew oram uuwimik nain ne wi mua wiena miiwa-pa uuwimik nain, mua unumiya ne wi mua unum marewa, wi unowa nain pun mia oposia wiar enimeka!” Naap farem-ikua.

19 Naap ikok maa feenap urufam, maa eneka asia nain, aria wi owow saria ne wiena irakow mua, wi unowiya wiam aawep arep ikemik, mua oos-pa karuok nain ona irakow teeria onaiya wiamiya irakowa naep. 20 Naap arep ikaiwkin maa eneka asia nain opamik. Ne mua oko pun opamik, mua nain wadol profet-ke, iiriw maa eneka asia-ke maakeya wia wadolalowami maa miililina onam-ikua. Naap onami wi eena maa eneka siisia ekima-pa ne wapena-pa wiar ikua ne maa eneka miira siraremik nain lotu onam-ikemik nain wia peeskimem-ikua. Aria wia opap ona fuura onom marewa-pa nan wia wafuramik, eena nomona mukun onaiya ikua nain. 21 Ne wiena irakow mua teeria mua oos-pa karuok nain-ke fura maala opaimika-pa fuunep ikua nain-pa wia ifakimeya umurumemik. Ne wiena sawi napuma nepa-ke wia enomakek.